கொச்சி கப்பல் கட்டும் தளம் லிமிடெட் என்பது இந்தியாவின் மிகப்பெரிய கப்பல் கட்டும்தளம் மற்றும் பராமரிப்பு வசதி கொண்ட நிறுவனமாகும். இது இந்தியாவின் கேரள மாநிலத்தில் உள்ள துறைமுக நகரமான கொச்சி நகரின் கடற்கரையில் அமைந்துள்ளது. கப்பல் தளத்தில் சரக்கு கப்பல்கள் மற்றும் இரட்டை வெளிச்சுவர் எண்ணெய் கப்பல்கள் கட்டப்படுகின்றன. தற்போது இது இந்தியக் கடற்படைக்கான முதல் உள்நாட்டு வானூர்தி தாங்கி கப்பலான INS விக்ராந்த்தைக் கட்டிவருகிறது. கொச்சின் கப்பல்கட்டும் தளமானது 1972 ஆம் ஆண்டில் இந்திய அரசு நிறுவனமாக இணைக்கப்பட்டது. இதன் முதல் பிரிவு 1982 இல் செயல்பாட்டுக்கு வந்தது. இந்நிறுவனத்திற்கு மினிரத்னா அந்தஸ்து உள்ளது. இதன் முற்றத்தில் 1.1 லட்சம் டன் வரை கப்பல்களைக் கட்டுவதற்கும், 1.25 லட்சம் டன்வரை, கப்பல்களைப் பழுதுபார்ப்பதற்கும் வசதிகள் என இந்தியாவில் மிகப்பெரிய வசதிகள் கொண்ட கப்பல் கட்டும் தளமாக இது உள்ளது. 2012 ஆகத்தில், நிதியாண்டின் இறுதியில் முதல் பொதுப்பங்கு வெளியீடு மூலம் மேலும் விரிவாக்கம் செய்ய ரூ. 15 பில்லியன் மூலதனத்தை திரட்டுவதற்கான திட்டங்களை இந்திய அரசு அறிவித்தது. இருப்பினும், நிறுவனம் தனது ஐபிஓவை நடத்தி மும்பை பங்குச் சந்தை மற்றும் இந்திய தேசிய பங்கு சந்தை ஆகியவற்றில் அதன் பங்குகளை பட்டியலிடும் 2017 ஆகத்துவரை இது செயல்பாட்டுக்கு வரவில்லை. Wikipedia